O Concello de Arzúa asinou o convenio para esta actuación coa Axencia de Turismo de Galicia no 2022.
Arzúa, 26 de Outubro. Hoxe o Alcalde Xoán Xesús Carril, a Concelleira de Turismo Begoña Balado e o Concelleiro de Facenda e Contratación Daniel Moscoso visitaron as obras que se están a realizar de renovación do Bar-Cafetaría da Área Recreativa de Ribadiso, máis coñecido como “O Chiringuito”.
Gran parte do financiamento desta obra é a cargo do convenio bianual de colaboración entre a Axencia de Turismo de Galicia e a Mancomunidade de Concellos Galegos do Camiño Francés que o Concello de Arzúa asinou en 2022.
O proxecto inclúe o levantado da canalización actualmente soterrada para realizar unha canle revestida, a drenaxe perimetral no ámbito das escadas cara a zona do río, a ampliación da zona pavimentada da cantina mellorando a súa accesibilidade, o pintado dos paramentos exteriores, substitución das luminarias, reposición de papeleiras e reparación do solado de pizarra nas zonas precisas.
A concelleira de Turismo, actual vicepresidenta da Mancomunidade de Concellos Galegos do Camiño Francés Begoña Balado, subliñou que “desde o Concello apostamos pola área de Ribadiso. En 2023 rematamos as obras de humanización do núcleo do Albergue Público e darémoslle continuidade con estas melloras na Área Recreativa”.
O alcalde de Arzúa e concelleiro de Obras no Rural, sinalou “a importancia de revitalizar a Área Recreativa de Ribadiso coa renovación do Chiringuito para as veciñas e veciños de Arzúa e poder desfrutar deste espazo único no noso concello”, e engadiu “que xa nos poñemos a traballar para poder sacar a licitación da concesión a tempo para a próxima tempada”.
Desde alcaldía afirman que é unha “mellora necesaria para esta contorna emblemática tan usada pola veciñanza e que tamén pode ser un gran atractivo para turistas e peregrinos pola súa proximidade ao Camiño de Santiago”. Ao fío disto engaden que a sinatura do convenio 2024-2025 traerá “máis melloras para este enclave tan particular de Arzúa”.
