Buscar
Cerrar este cuadro de búsqueda.
Buscar
Cerrar este cuadro de búsqueda.

Contorno

Contorno Arzúa está encadrada na área central de Galiza, ao sur da provincia da Coruña. Nesa dirección linda co concello de Santiso e coa provincia de Pontevedra da que a separa o río Ulla, limitando concretamente co municipio de Vila de Cruces. Ao norte de Arzúa están os concellos de Frades e Boimorto, con este último fai fronteira tamén polo leste, xunto a Melide, e por poñente fai límite cos municipios de Touro e O Pino.

A superficie do concello é de 158 quilómetros cadrados e, segundo os datos censais de 2001, a cifra total de habitantes ascende a 6.633 dando lugar a unha densidade de poboación de 43 habitantes por quilómetro cadrado.

Climaticamente Arzúa atópase nunha área de transición con dominio de clima oceánico hiperhúmido e oceánico continental cunha media de temperaturas que se sitúa nos 13ºC (con 7º de mínima e 22º de temperatura máxima) e con prepitacións que adoitan ser de 1.500 mm por ano.

O río Tambre e, especialmente, o Ulla determinan o contorno arzuán. A área norte do concello está marcada polo río Tambre, que sinala o límite co concello de Frades, e as zonas central e sur sinaladas polo Ulla e os seus afluentes, principalmente os ríos Boente, que establece o límite entre os concellos de Arzúa e Santiso; Iso, o máis importante do municipio, que nace na ladeira occidental do monte Bocelo, en Boimorto; e Brandeso.

Os principais cumes do concello, situado a 389 metros sobre o nivel do mar, son os montes Cornado, con 483 metros; Martelo, con 453 metros; do Viso con 446; e Filgueira con 436 metros de altura.

A capital municipal, que se encaixa entre os ríos Brandeso, Carracedo e Iso, dista 39 quilómetros de Compostela, 68 da capital da provincia e 63 da cidade de Lugo.