Dende o Departamento de Cultura do Concello de Arzúa, dirixido por Aurora Varela, ponse en marcha de cara á vindeira Semana Santa unha nova edición da actividade A vila do mañá despois do éxito das anteriores desde que se iniciou este proxecto no noso municipio no mes de setembro do 2020.
Nesta ocasión o programa celebrarase os días 3, 4, 5 e 6 de abril coincidindo coas vacacións escolares.
A Vila do Mañá é un proxecto educativo e de divulgación no que a través do xogo e da creatividade se transforma o lugar que habitamos dando voz aos que normalmente non a teñen, os nenos e os adolescentes, impulsando o seu dereito para formarse un xuízo propio do hábitat no que viven e a poder expresalo e poñelo de manifesto.
Con esta iniciativa, que ao mesmo tempo serve como medida para axudar á conciliación en periodo de vacacións escolares, búscase tamén estimular unha actitude crítica dos máis novos para impulsar o seu desenvolvemento como unha cidadanía activa pois serán os responsables da vila do futuro.
Durante as xornadas que dura esta nova entrega, os participantes desfrutarán de diversas actividades de lecer e creativas principalmente ao aire libre polo casco urbano de Arzúa, tendo como actividade central identificar e sinalizar os lugares destacados da nosa vila tanto para a veciñanza como para os visitantes aproveitando o paso do Camiño de Santiago.
Para participar é obrigatorio inscribirse previamente nas oficinas do Departamento de Cultura ou chamando ao teléfono 981500222 desde mañá, martes 28, ata este venres 31 de marzo en horario de 8:30 a 14:00h. Hai dúas quendas; polas mañás de 10:00 a 13:30 para menores de 5 a 11 anos e polas tardes, de 16:30 a 20:00h, para rapazada de 12 anos en diante. A inscrición é gratuíta e as prazas limitadas. As mesmas iranse cubrindo por rigorosa orde de inscrición.
A Concelleira de Cultura, Aurora Varela, aposta por esta iniciativa e valora positivamente “ofertar un espazo de lecer diferente, creativo e sustentable no que se traballe a paisaxe e o entorno urbano do noso día a día a través do sempre interesente punto de vista das nenas e nenos”.
