Arzúa bota a andar un novo proxecto de fomento da lectura. Baixo o título “Arzúa, cruzamento de Camiños, cruzamento de libros” o Concello saca os libros á rúa e instala casetas no exterior para o seu depósito.
Arzúa, 7 de abril de 2022. O Departamento de Cultura do Concello de Arzúa pon en marcha un novo proxecto titulado Arzúa, cruzamento de Camiños, cruzamento de libros, unha das diferentes accións para fomentar a lectura incluídas na programación municipal Primavera de Cultura.
Mañá venres día 8 arrincará esta iniciativa que conta coa colaboración da Biblioteca Municipal e do IES de Arzúa. Instalaranse tres puntos de acceso á lectura no Parque infantil de Arzúa, Parque infantil de Sta. María e Prazoleta da Rúa das Dores. Son tres librarías de madeira nas que haberá a disposición de calquera persoa interesada libros para coller de balde, ler e volver a depositar en calquera dos puntos indicados. Haberá libros para todos os públicos e os mesmos contarán cunha etiqueta identificativa deste proxecto e cunha solapa no seu interior para que, toda persoa que o desexe, deixe quedar o seu nome e a data na que colleu o libro para deixar constancia da itinerancia de cada exemplar.
Esta práctica coñecida como bookcrossing consiste en deixar libros en lugares públicos para que os recollan outros lectores, que despois farán o mesmo.
Mañá, coincidindo co primeiro día no que bota a andar esta proposta, farase a inauguración cun acto simbólico do depósito dos libros na caseta instalada no Parque Infantil de Arzúa ás 12:30h. Neste acto, aberto ao público, participarán a Concelleira de Cultura, Aurora Varela, e un grupo de voluntariado da biblioteca escolar do IES de Arzúa.
En palabras da propia concelleira, Aurora Varela anima “a toda a veciñanza a participar neste novidoso e ilusionante proxecto que nace co obxectivo de fomentar a lectura e de faciliar o seu acceso a toda a poboación”. Ao mesmo tempo, tamén pide a colaboración dos futuros usuarios para que respecten as normas de funcionamento desta iniciativa co fin de que se poidan aproveitar dela cantas máis persoas mellor.
