O Concello de Arzúa, a través do seu Centro de Información ás Mulleres, acollerá o programa da Xunta de Galicia “Muller Dixital”, que ten por obxectivo formar a mulleres desempregadas ou en mellora de emprego en accións formativas para a adquisición de competencia dixital.
O Programa, financiado pola Unión Europea, no Marco do Plan de Recuperación, Transformación e Resiliencia, procura a mellora das capacidades dixitais das persoas desempregadas para impulsar o emprendemento e o desenvolvemento rural e reducir a fenda de xénero.
Os contidos dos cursos, que poderán ser de competencias dixitais básicas, avanzadas e de iniciación as competencias dixitais para o emprendemento, atenden ás competencias dixitais recollidas no Marco Europeo de Competencias dixitais para a Cidadanía, e se dividen en 5 áreas:
Área 1: Información. Navegación, procura e filtrado de información.
Área 2: Comunicación. Interacción a través de tecnoloxías.
Área 3: Creación de contidos. Desenvolvemento de contidos.
Área 4: Seguridade. Protección de dispositivos.
Área 5: Resolución de problemas.
A presentación do programa realizarase o próximo venres 4 de novembro ás 12:00 horas na aula CeMIT, situada no Edificio de Servizos Múltiples na Rúa de Lugo. Nese mesmo día poderase realizar a inscrición no programa e unha proba de nivel. Por iso, para poder inscribirse, deberase acudir coa demanda de emprego ou de mellora de emprego e o DNI ou NIE.
Ao rematar o curso, outorgarase acreditación oficial e dotarase ás participantes dun terminal dixital; nesta caso, unha tablet con teclado externo.
Para máis información poderase acudir ao Centro de Información ás Mulleres (Rúa Santiago, 2) ou chamar ao teléfono 981 501 101.
