Arzúa é terra do queixo destino verde de Galicia paso dos peregrin@s

Cabalgata de Reis 2017

Cabalgata de Reis 2017

A visita máis agardada chegará mañá pola tarde a Arzúa; segundo informa o departamento de Cultura do Concello de Arzúa a esperada Cabalgata de Reis celebrarase este xoves, día 5 de xaneiro, ás cinco e media da tarde.

Neste 2017 o desfile contará con tres novas carrozas decoradas con adornos propios do Nadal e totalmente iluminadas con microbombillas LED para os Reis e os seus paxes reais. Como xa vén sendo tradicional abrirán o desfile os paxes a cabalo grazas á colaboración da Asociación de Amigos do Cabalo “O Estribo” que conducirán o percorrido ata rematar no Recinto Feiral “Terra do Queixo” coa recepción e o reparto de agasallos. As Súas Maxestades traerán moreas de caramelos e lambetadas sen glute e feixes de libros para seguir fomentando en Arzúa a lectura e o uso da nosa lingua. Como novidade, este ano os Reis de Oriente lucirán novos traxes e a cabalgata contará coa animación do espectáculo itinerante “Pinocho e compañía” que interactuarán co público en todo momento.

O percorrido marcado polo Departamento de Cultura para a Cabalgata sairá dende a Casa da Cultura e pasará polas seguintes rúas: Rúa de Santiago, Praza de Galiza, Avenida de Lugo, Fraga do Rei, Ramón Franco, Xosé Neira Vilas, Praza de San Xoan e dará media volta para pasar de novo polas rúas Xosé Neira Vilas e Ramón Franco para dirixirse ao Recinto Feiral “Terra do Queixo” pola Padre Pardo. Unha vez finalizado o itinerario, e coas Súas Maxestades no multiusos, haberá inchables e obradoiros para amenizar a tarde. Unha vez finalizada a recepción no interior do recinto feiral, os Magos de Oriente visitarán aos maiores da Residencia San José.

 

Compartir en facebook
Facebook
Compartir en twitter
Twitter
Compartir en linkedin
LinkedIn
Compartir en pinterest
Pinterest
Compartir en whatsapp
WhatsApp
Compartir en email
Email