O Departamento de Cultura do Concello de Arzúa organiza o Ciclo de Teatro no Outono que xa vai pola súa sexta edición e que comeza este domingo día 21 de outubro no local social da parroquia de Boente.
O grupo de teatro Artestudio será o encargado de comezar o ciclo de teatro deste ano coa representación da obra Feirantes, unha adaptación do texto de Outros Feirantes de Álvaro Cunqueiro coa que se achega a nosa tradición oral dun xeito distinto e divertido.
A seguinte actuación teatral será no local social de Burres o domingo 28 de outubro a cargo da compañía Dínamo Teatro que poñerán en escea Radio Torreiro, unha divertida parodia das costumes e tradicións das festas da nosa terra protagonizada polo coñecido humorista Pedro Brandariz e por Felipe Díaz “Caxoto”.
O VI Ciclo de Teatro no Outuono continuará no mes de novembro con dúas representacións máis, neste caso na Casa da Cultura de Arzúa, a cargo dos grupos Ti e Máis Eu Teatro cunha obra infantil o sábado 3 e da Aula de Teatro Municipal Ánxel Casal poñendo o broche de ouro o domingo 11. Todas as actuacións serán ás seis da tarde.
A Concelleira de Cultura, Natalia Pereira Rei, convida a todos os veciños e veciñas a participar “porque o ciclo de teatro é unha forte aposta do Concello de Arzúa por manter viva a vida cultural tamén no outono tanto na vila coma nas parroquias” e considérao “unha boa alternativa de ocio e lecer para pasar un bo rato con todos os veciños e veciñas”.
Domingo 21 Outubro
ARTESTUDIO TEATRO «Feirantes»
18:00 · L. Social de Boente
Domingo 28 Outubro
DÍNAMO TEATRO «Radio Torreiro»
18:00 · L. Social de Burres
Sábado 3 Novembro
TI E MÁIS EU TEATRO «A bruxa do Magosto» (infantil)
18:00 · Casa da Cultura
Domingo11 Novembro
AULA DE TEATRO ÁNXEL CASAL «O estrano velorio»
18:00 · Casa da Cultura