Arzúa é terra do queixo destino verde de Galicia paso dos peregrin@s

Programa de conciliación XOGARZÚA

Programa de conciliación XOGARZÚA Programa de conciliación XOGARZÚA

Arzúa recupera o programa de conciliación da vida familiar e laboral XOGARZÚA para este verán

 

A Concellería de Benestar Social e Igualdade do Concello de Arzúa pon en funcionamento, de novo, o programa Xogarzúa para a conciliación do desenvolvemento persoal e a vida familiar, dirixido a nenos e nenas con idades comprendidas entre os 3 e os 12 anos.

Este proxecto pioneiro no noso Concello é unha alternativa específica na que a través do xogo nenas e nenos adquiren coñecemento que forma parte do seu proceso educativo. Desenvolve unha morea de actividades pensadas para fomentar a convivencia nun marco de valores: respecto polo contorno, polos compañeiros, a igualdade, a cooperación mutua e o crecemento persoal a través do xogo, obradoiros, saídas didácticas e moitas outras iniciativas.

Neste verán 2017 traballaranse especialmente os valores da tolerancia e a igualdade. A diversión, o entretemento e a aprendizaxe serán as claves deste programa do que poderán gozar nenos e nenas de Arzúa, sempre acompañados por persoal responsable e cualificado.

Xogarzúa iniciarase o 26 de xuño e finalizará o día 1 de setembro. O horario será das 9.30 ás 14 horas. Haberá 30 prazas que se distribuirán en dous grupos: 15 prazas para nenos e nenas de 3 a 7 anos e outras tantas para menores de 8 a 12 anos.

O prazo de inscrición para as familias interesadas será do 6 ao 16 de xuño; as solicitudes e documentación complementaria poderase recoller no Centro de Información á Muller, situado na Casa do Concello de Arzúa.

Para poder acceder ao programa será requisito necesario que traballe un ou ambos proxenitores, que o neno ou nena estea empadroado no Concello de Arzúa e aportar o xustificante do pago das taxas na correspondente entidade bancaria.

A Concelleira de Benestar Social de Arzúa, Aurora Varela, convida ás familias do municipio a “aproveitar esta oportunidade que ofrecemos para axudar á conciliación da vida familiar e laboral daqueles pais e nais que o precisen, para cubrir o tempo de ocio dos seus fillos e fillas durante as vacacións de verán”.

 

 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp
Share on email
Email
Sede Electrónica
Perfil do Contratante
Portal de Transparencia