Movemento pola Paz-MPDL en Galicia porá en marcha un Punto de Información Móbil no concello de Arzúa, en coordinación co Centro de Información ás Mulleres e cos Servizos Sociais, no que constitúe unha proposta de coordinación e achegamento ao concello da súa experiencia na atención a mulleres e, en particular mulleres migrantes.
A proposta pretende contribuír a reforzar aquelas áreas de intervención que xa levan a cabo dende o Concello, aportando un equipo complementario e especializado de profesionais que contribúa a ampliar a oferta de asistencia social no concello de Arzúa, desde a coordinación e comunicación continua coa equipa municipal.
O Punto de Información móbil terá dúas liñas de actuación durante o ano 2023. Por unha banda, un punto de atención composto por unha traballadora social e unha avogada dirixido a persoas migrantes, en especial, a mulleres. E por outra, a realización de actividades formativas, informativas e de sensibilización dirixidas tanto a poboación migrante como á cidadanía en xeral.
A primeira destas actividades consistirá nun obradoiro xurídico gratuíto sobre os mecanismos para a regularización administrativa de persoas migrantes. Será o próximo 27 de febreiro en horario de 11:30 a 13:30 na Aula Multiusos de Edificio Sociocultural María Mariño.
Esta actividade está dirixida tanto á poboación migrante como a profesionais do ámbito social ou empresariado da contorna, e para asistir non é necesaria inscrición.
Para más información pódese contactar co Centro de Información ás Mulleres do Concello de Arzúa, na Rúa Santiago, 2, ou chamando ao teléfono 981 501 101.
