Con motivo do Entroido 2022 o Concello de Arzúa organiza un concurso o domingo 20 de febreiro ás 17:00h no Multiusos Terra do Queixo de Arzúa. Para fomentar a participación convócase un ano máis o tradicional concurso de disfraces de acordo coas seguintes bases:
PRIMEIRA. Para participar é obrigatorio inscribirse previamente no Departamento de Cultura do Concello de Arzúa ou chamando ao 981500222 desde o día seguinte ao da publicación no BOP do extracto da convocatoria ata o xoves 17 de febreiro, en horario de 8:30 a 14:00h.Tamén se pode presentar solicitude de participación pola Sede Electrónica, mediante modelo de instancia xeral.
No momento da inscrición deberase indicar o número de compoñentes e o lema ou nome do disfraz para a identificación. Os participantes recibirán o día do concurso un dorsal identificativo.
A inscrición efectuada por persoas físicas (sen ser en representación dunha persoa xurídica), para participar en grupo ou comparsa, determinará a asunción pola dita persoa de todas as obrigas que derivan da obtención dos premios, incluídas as de índole fiscal. Ditas persoas previamente á participación asinarán declaración responsable ao respecto, presentarán documentación acreditativa da personalidade, cumprimento de requisitos para ser beneficiario dos premios, así como certificado de conta bancaria na que efectuar o ingreso, de corresponder.
SEGUNDA: Haberá catro categorías:
– Comparsa: conxunto de persoas formado por un mínimo de 9 compoñentes representando un mesmo motivo.
– Grupo: conxunto de persoas de entre 2 e 8 compoñentes representando un mesmo motivo.
– Individual infantil: nesta modalidade poderán participar nenos e nenas con idades comprendidas entre os 0 e 17 anos.
– Individual adulto: nesta modalidade poderán participar persoas de 18 anos en diante.
A mesma persoa non poderá participar en máis dunha categoría
TERCEIRA: Os premios establecidos polo Departamento de Cultura son:
Comparsas
1º: 550 €
2º: 300 €
3º: 150 €
Grupos
1º: 300 €
2º: 200 €
3º: 120 €
Individual Infantil
1º: 120 €
2º: 80 €
Individual Adulto
1º: 120 €
2º: 80 €
O xurado tamén concederá un premio simpatía de 100 euros a un grupo ou comparsa do municipio que non acadara ningún dos premios anteriores e que sume a maior puntuación no apartado “simpatía” da valoración do xurado.
CUARTA: A cualificación das distintas modalidades será determinada polo xurado do concurso que estará composto por catro representantes nomeados polo Departamento de Cultura do Concello de Arzúa.
QUINTA: Durante o desenvolvemento do concurso, o xurado valorará:
Comparsas e Grupos:
– Vestiario e maquillaxe 0 a 4 puntos
– Traballo feito a man 0 a 2 puntos
– Emprego de materiais de refugallo 0 a 2 puntos
– Orixinalidade 0 a 3 puntos
– Coreografía e música 0 a 3 puntos
– Organización e efecto do conxunto 0 a 3 puntos
– Simpatía (interacción co público) 0 a 5 puntos
Disfraces Individuais (infantís e adultos):
– Orixinalidade do vestiario 0 a 4 puntos
– Traballo feito a man 0 a 2 puntos
– Emprego de materiais de refugallo 0 a 2 puntos
– Maquillaxe 0 a 2 puntos
– Simpatía (interacción co público) 0 a 5 puntos
SEXTA: Desenvolvemento do concurso:
Os participantes deberán presentarse no Multiusos Terra do Queixo como mínimo media hora antes do inicio pasando pola mesa de control xunta o escenario para recoller o dorsal identificativo.
A participación desenvolverase sobre escenario (co público sentado) cun tempo máximo de 5 minutos. As medidas do escenario serán de 8 x 10 metros.
Os participantes que precisen de música específica para a actuación deberana enviar por correo electrónico en formato .mp3 a cultura@concellodearzua.com ou indicar o título da canción e o nome do grupo/artista antes do 17 de febreiro ás 14:00h.
Os premios serán aboados mediante transferencia bancaria e a entrega simbólica dos mesmos terá lugar o mesmo día de celebración do concurso, unha vez feita a avaliación polo xurado.
SÉTIMA: A orde de actuación será coincidindo coa orde de inscrición nas diferentes modalidades (individual infantil, individual adulto, grupos e comparsas).
OITAVA: A celebración deste concurso estará suxeita á evolución da pandemia e o seu desenvolvemento poderá verse modificado parcial ou totalmente para dar debido cumprimento ás medidas e protocolos que as autoridades competentes vaian definindo. Calquera modificación que altere o desenvolvemento previsto será publicada na páxina web www.arzua.gal.
NOVENA: A participación no concurso supón a aceptación destas bases, sendo a decisión do xurado inapelable.
Os presentes premios serán outorgados con cargo á partida orzamentaria 334.480.02 do vixente orzamento, ata o límite de 2.120 euros.
Os premios levarán consigo a retención en concepto de IRPF, que resulte da aplicación segundo as normas contidas na normativa reguladora do imposto.
En Arzúa, 25 de xaneiro de 2022.
