Arzúa é terra do queixo destino verde de Galicia paso dos peregrin@s

Arzúa reinventa a súa Feira de Capóns de Nadal con importantes premios para os mellores exemplares

O Concello de Arzúa vén de dar un importante impulso a unha das feiras tradicionais máis importantes que se celebran na localidade, a Feira de Capóns de Nadal que cada 22 de decembro ten lugar no municipio congregando a numerosos criadores dun dos productos estrela das festas.

Coa intención de darlle un novo pulo á feira procurando que, cada ano, participen máis veciños tanto do propio concello como da comarca, o goberno municipal programou unha importante subida na cuantía dos premios que se entregarán aos mellores exemplares de cada unha das tres modalidades na que se pode participar: galos vivos, capóns cebados e galos piñeiros.

Deste xeito repartiránse un total de 1.200 euros entre os exemplares presentes no recinto, que serán valorados por un experto que analizará a súa presentación, coidado, hixiene e beleza, entre outras características. As mellores parellas de cada modalidade serán premiadas con 200 euros; haberá un segundo premio de 125 euros e un terceiro de 75 euros para cada unha das modalidades.

O alcalde de Arzúa, José Luis García, deu a coñecer o programa da feira que inclúe, ademais, un pasacalles polas rúas da localidade a cargo dun grupo de música tradicional a partir das 10 da mañá; ás 11,30 horas terá lugar a entrega de premios e ás 12 pecharase o certame coa actuación do grupo de gaitas Castro Curbín.

As persoas que desexen participar no certame poderán expoñer os seus productos á venda dende as 7,30 da mañá, hora na que xa estarán abertas as portas do Recinto Feiral Terra do Queixo, lugar habilitado polo concello para a celebración do evento, que coincide coa feira mensual do día 22.

O alcalde de Arzúa, José Luis García, quere facer un chamamento a  todos os veciños e veciñas para que participen na feira xa que “é un dos nosos referentes, moita xente de fóra achégase neste día a Arzúa para comprar aquí este produto que, dende sempre, contou coa fama de ser de boa calidade”

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp
Share on email
Email