Arzúa é terra do queixo destino verde de Galicia paso dos peregrin@s

ARZÚA PRESENTA O PROGRAMA DE ACTIVIDADES DO SERVIZO DE NORMALIZACIÓN LINGÜÍSTICA

ARZÚA PRESENTA O PROGRAMA DE ACTIVIDADES DO SERVIZO DE NORMALIZACIÓN LINGÜÍSTICA

Cursos, obradoiros e outras actividades dirixidas á xente moza, profesionais da hostalaría e o comercio local.

O Servizo de Normalización Lingüística do Concello de Arzúa inaugura na última semana de setembro un programa de cursos, obradoiros e outras actividades que teñen por obxectivo fomentar o galego en eidos como as redes sociais, a hostalaría, as artes urbanas ou o deporte.
Entre os cursos ofertados encóntrase un Curso de Redes Sociais para o comercio local, que terá lugar os días 25, 26 e 27 de setembro en horario de 21.00 a 22.30 h. Aproveitar as vantaxes que nos ofrecen as novas tecnoloxías e aprender algunhas técnicas para estar, e estar ben, nas redes sociais, son algúns dos obxectivos deste curso impartido polo Instituto de Medios Sociales. Para os profesionais da hostalaría está pensado o Curso cata de viños galegos, que se celebrará o 8 e 9 de outubro de 17.00 a 19.00 h. Os profesionais da Asociación Galega de Viticultura achégannos a través dunha charla e unha cata comentada as distintas Denominacións de Orixe e Indicacións Xeográficas Protexidas do noso país.
Ambos os cursos contan con prazas limitadas e precisan de inscrición previa. Abrirase tamén unha listaxe de agarda para outras persoas interesadas, que poderán asistir de quedaren prazas vacantes.
Ademais, o deporte e as artes urbanas son tamén protagonistas desta nova programación do SNL. O 27 de setembro ás 17.00 h o Pavillón Municipal do Viso acollerá a Xincana Lingua Forza 3, unha proba que conxuga destreza física e lingüística dirixida á rapazada de 6 a 12 anos. Esta actividade ten prazas limitadas e precisa de inscrición previa.
O deporte sobre rodas será o protagonista da tarde do 28 de setembro. De 16.00 a 20.00 h o Recinto Feiral da vila contará cun Parque móbil de skateboard para uso libre de afeccionados a partir de 10 anos. Ademais, rapaces e rapazas a partir de 8 anos poderán aprender algunhas técnicas do patinete nun Obradoiro de Skateboard.
E seguindo coas artes urbanas, e enmarcadas entre as actividades da Feira Ecolóxica que acollerá a vila durante a fin de semana, o 29 de setembro ás 11.00 h terá lugar unha Exhibición de Graffiti da man dos artistas de Vella Escola, e ás 17.00 h un Obradoiro de Graffiti para rapazas e rapaces a partir de 10 anos. Este obradoiro conta con prazas limitadas e precisa de inscrición previa. Finalmente, o 30 de setembro ás 17.00 h terá lugar no Campo da Feira un Obradoiro de Slackline para a rapazas e rapaces a partir de 10 anos.

As inscricións para os cursos e obradoiros que o precisan faranse no Servizo de Normalización Lingüística do Concello de Arzúa (Casa do Concello, 2º andar) ou a través do teléfono 981 500 000 (Ext. 119) en horario de 9.00 a 14.00 h.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp
Share on email
Email
Sede Electrónica
Perfil do Contratante
Portal de Transparencia