Arzúa é terra do queixo destino verde de Galicia paso dos peregrin@s

Actividades nas feiras de setembro, outubro e novembro

Arzúa continuará dinamizando as feiras dos días 8 e 22 durante os vindeiros meses

Actividades infantís, actuacións musicais e animación de rúa  serán os principais alicientes para a promoción quincenal da feira

O Concello de Arzúa continúa desenvolvendo o plan de promoción e dinamización das feiras quincenais dos días oito e vinte e dous. Para os meses de setembro, outubro e novembro as propostas centraranse en actividades infantís, actuacións musicais e animación de rúa, para todos os públicos.

A actividade máis próxima terá lugar o vindeiro día 8 de setembro; se o tempo acompaña instalarase na Praza de Galica un parque de inchables e actividades deportivas para os máis pequenos da casa, que aínda están de vacacións. Será durante a mañá e totalmente de balde.

A charanga ‘BB+’ e o espectáculo itinerante titulado ‘Unha de medo’ animarán os mercados de outubro e novembro.

Este programa de dinamización, que leva por nome ‘Ven ás feiras do 8 e 22’, deu comezo no mes de xuño coa realización de actividades de animación e coa defusión do mesmo a través de diversos medios publicitarios co fin de reactivar estes mercados tradicionais e impulsar a economía local.

Esta nova iniciativa, enmarcada no Plan de Promoción e Dinamización das feiras do 8 e 22 de Arzúa, pretende poñer en valor o mercado tradicional que reúne durante todo o ano a veciños e veciñas e atrae a numerosos visitantes favorecendo ao tecido empresarial da vila.

Nas vindeiras datas, o concello seguirá coa promoción das feiras a través de cartelería, folletos e outros soportes publicitarios nas inmediacións do propio recinto feiral e coa difusión na web municipal, radio local, redes sociais e prensa.

O obxectivo tamén é dinamizar a vila con actividades variadas que poidan atraer a máis público e lograr que as persoas que nos visiten permanezan durante máis tempo en Arzúa e aproveiten, como se pretende con este plan, para facer outras mercas e quedar a xantar.

 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp
Share on email
Email
Sede Electrónica
Perfil do Contratante
Portal de Transparencia